Јавниот сектор во пократок рок ќе ги исплаќа обврските кон приватниот сектор

Од:

Ќе се намалува рокот во кој јавниот сектор ќе ги исплаќа обврските што ги има кон приватниот сектор, предвидуваат предлог-измените на Законот за финансиска дисциплина што ги подготви Министерството за финансии.

Со нив се предвидува постепено намалување на рокот на плаќање на обврските од 60 на 30 дена на субјектите од јавниот сектор чии сметки се во трезорската сметка на Министерството за финансии, како и од 90 на 60 дена на субјектите од јавниот сектор чии сметки се во рамки на трезорската сметка на Фондот за здравствено осигурување.

Според Предлог-законското решение, од јануари 2023 година рокот за подмирување на обврските чии сметки се во рамки на трезорската сметка на Министерството за финансии ќе треба да биде 50 дена, од јануари 2024 година да изнесува 40 дена, за веќе во 2025 година тој рок да е 30 дена. Рокот за подмирување на обврските кај субјектите чии сметки се во рамки на трезорската сметка на Фондот за здравствено осигурување од јануари 2023 година ќе треба да биде 80 дена, од јануари 2024 година 70 дена и во јануари 2025 година ќе се намали на 60 дена.

– Со измените се врши усогласување со роковите за исполнување на паричните обврски согласно Директивата за задоцнето плаќање, велат од Министерството за финансии.

Во актуелниот Закон за финансиска дисциплина е уредено дека во деловните трансакции меѓу субјект од јавниот сектор и економски оператор од приватниот сектор, кога субјектот од јавниот сектор се јавува како должник, не може да се договори рок за исполнување на паричните обврски подолг од 60 дена. Во случај на трансакција кога Фондот за здравствено осигурување, јавните здравствени установи, универзитетските клиники, заводите и ургентните центри се јавуваат како должници, не може да се договори рок за исполнување на паричната обврска подолг од 90 дена.

Предлог-законското решение е ставено на ЕНЕР. Законот за финансиска дисциплина е во сила од мај 2014 година и со него, како што наведуваат од ресорното Министерство, се обезбедува сигурна наплата на побарувањата и се обезбедува ликвидноста на компаниите.

Би можело да ве интересира

Бесими: Нема замрзнување на платите, работиме на системско и одржливо решение за раст на платите во јавниот сектор

Горан Наумовски

Бесими: Целосна интеграција во ЕУ значи реформи, решавање предизвици и долгорочна стабилност во регионот

Горан Наумовски

Бесими: Нема експропријација на дивоградби, законски измени заради забрзана динамика и пониски трошоци за реализација на проектите

Ана Ололовска

МФ: Интересот за еврообврзницата поголем за половина милијарда евра од претходната аукција

Ана Ололовска

ССМ најави кривична пријава против министерот за финансии Фатмир Бесими

Ана Ололовска

Најава за генерален штрајк од Синдикат на вработените во Министерството за финансии

Ана Ололовска