Трета година по ред во винарската визба „Тиквеш“ од Кавадарци се одржува Фестивал на младо вино.
– Целта на настанот е да се проба младото вино на винаријата и да се оцени неговиот потенцијал. Тоа е дел од нашата определба за подигнување на винската култура во Македонија преку популаризација на нашето вино баш на овој посебен ден. Денот е симболичен затоа што третата недела од ноември обично важи како ден кога се отвараат бочвите и имаме единствена можност да го пробаме виното и нормално стручните лица дополнително да го оценат неговиот потенцијал, вели директорот на „Тиквеш“ Игор Илиевски.
Тој додава дека енолошки тим винарската визба веќе има одредени оценки и оти генерално бербата е оценета како одлична, а вината со одличен потенцијал.
– Оваа година сакаме да ги промовираме таканаречените четири звезди или четирите најдобри вина кои имаат најдобар потенцијал во моментов. Тоа се темјаниката и шардонето од белите вина и вранецот и мерлото од црвените, додава Илиевски.
Денеска се дегустира младо вино кое не е сеуште наменето за продажба.
Винаријата се обидува да го освои американскиот пазар, а како што вели Илиевски, сериозни поместувања напред имало и при продажбата во скандинавските земји.