Директорот на Фондот за иновации Јован Деспотовски ќе учествува на Innovation Talk 2018 – регионална конференција за технолошки иновации која се одржува денеска во Белград.
Деспотовски, ќе учествува на министерскиот панел на кој заедно со министрите задолжени за иновации, наука, истражување и технологија на земјите од регионот, ќе зборува за активностите кои македонската Влада ги презема за подобрување на бизнис екосистемот и можностите за поголема достапност до финансиска поддршка за компаниите во земјата.
На маргините на коференцијата ќе има и билатерални средби со Ненад Поповиќ, министер за иновации и технолошки развој на Србија и со Ален Шераниќ, министер за наука и технологија, на кои ќе бидат разменети искуства и разгледани можностите за регионална соработка.
На конференцијата ќе се обрати и Марија Габриел, еврокомесарка задолжена за дигитална економија и општество, а истакнати регионални и локални експерти од јавни и меѓународни компании ќе дебатираат на различни панели меѓу кои се паметни градови, индустрија 4.0, технологија на иднината и соработка меѓу корпорации и иновации.
Учесниците на конференцијата ќе бидат запознаени со најновите трендови во областа на иновациите и нивна примена во општеството и економијата, како и со потенцијалите за користење на нови технологии во бизнисот, начинот на кој истите ги менуваат традиционалните индустрии, како и кои се националните развојни политики во областа.
Целта на настанот е на едно место да се соберат сите релевантни актери од иновативниот екосистем на регионот како придонес кон отворање на нови можности за соработка во регионот.