Над десет милиони евра во шестиот пакет на економски мерки ќе бидат наменети за помош на туристичко угостителскиот сектор, најави денеска министерот за економија Крешник Бектеши.
– Како што почнавме со поддршка на туристичко угостителскиот сектор така продолжуваме. И во овој пакет се предвидени мерки кои ќе бидат еднократна помош или во облик на грант. Угостителските компании кои се регистрирани со шифра на приоритетна дејност 56.10, 56.29, и 56.30 ќе добијат директна помош од 30 отсто од просечно прикажаните приходи за 2019, вклучувајќи ја и 2020 година. Дополнително на тоа ќе добијат и еднократна помош во износ од 15.200 денари за секој вработен во нивните субјекти, рече Бектеши.
На угостителските објекти, додаде тој, кои се основани во текот на 2020 година како просек ќе им се зема периодот од денот на основање, па се до првиот квартал на 2021 година за да се утврди висината на помошта што ќе им се даде.
– Со директна финансиска поддршка ќе бидат поддржани и туристичките агенции иако немаше одлука на Владата за нивно затворање. Сите лиценцирани агенции со Б лиценца, кои имаат од еден до три вработени, ќе добијат до 2.000 евра, а со А лиценца, со четири или повеќе вработени, најмногу 5.000 евра еднократна помош, истакна Бектеши.
Тој нагласи дека се во постојана координација со Комисијата за заразни болести и Министерството за здравство и будно ја следат ситуацијата и ако е потребно, додаде, повторно ќе излезат во пресрет.
Министерот потсети дека и во претходните пакети на мерки, главно во четвртиот пакет, за овој сектор беа одвоени околу 10 милиони евра. Средства беа доделени за, како што посочи Бектеши, ваучери за домашен туризам, враќање на уплатена туристичка такса, директни грантови за туристички агенции агенции, кофинансирање на настани и конференции, грантови за категоризирани ресторани за свадби, за игротеки и за лиценцирани туристички водичи.
Прашан дали и годинава се планира да се доделуваат туристички ваучери за домашен туризам од 6.000 денари за граѓаните со пониски примања, Бектеши рече дека во текот на мај ќе биде објавен нов повик за тоа.
– Сите работници со ниски приходи, чии месечни примања не надминуваат 30.000 денари по семејство, ќе можат да аплицираат на повикот и да добијат соодветни ваучери. Тоа е редовна програма која ја имплементира Министерството за економија за поттикнување на домашниот туризам. Ќе биде објавен во првата половина на мај за да можат да ги користат одморите. Директна финансиска поддршка ќе има и во петтиот пакет на мерки, кој сега ќе почне да се реализира, и за хотелските капацитети кои беа надвор од туристичките центри и не можеа да ги користат ваучерите кои се издадоа од Министерството од претходната година кои главно се искористија во регионите на Охрид и Струга и некои други туристички дестинации. За тие што биле изоставени предвидена е сума од еден милион евра, потенцира Бектеши.