Научните соработници од Институтот за старословенска култура – Прилеп годинава активно ќе работат на заштита и промоција на обичајот „Водичарки“ од село Беранци, општина Могила, Битолско.
Проектот е дел од Националната стратегија за развој на културата 2013-2017 година, во која се предвидени активности за заштита и програми за негување и популаризација на нематеријалното културно наследство.
Со проектот, кој е поддржан од Министерството за култура, се предвидени конкретни мерки за заштита и промоција на ова значајно културно наследство кое претставува женска поворка во која Водичарките се главни носители на народното празнување на обичајот Водици (Машки и Женски Водици), како и обредните дејства на празникот Цветници (Винопиец).
Предвидено е снимање на ЦД со 50-тина водичарски обредни песни, подготовка на костимографија и сценографија за презентација на ова добро на културни манифестации и фестивали каде што се претставува „живото фолклорно наследство“, како и набавка на делови од облека: опинци, шамии -„даркми“ и сл. Во рамки на проектот, завршено е и снимањето на видеоматеријал за изработка на спот преку кој ќе се презентира овој вековен обичај, кој е дел од македонското нематеријално наследство.
Како што информира Министерството за култура, се очекува да се зголеми нивото на свеста за значењето на ова културно наследство и да се овозможи поголема промоција на духовното културно богатство.