Со низа активности и манифестации денеска во Охрид ќе биде одбележана 250-годишнината од раѓањето на познатиот композитор Лудвиг ван Бетовен.
Предвидено е на повеќе локации низ градот да се изведуваат и пуштаат дела на славниот светски композитор, а негови композиции ќе се емитуваат и на локалните радио станици како и во угостителските објекти.
Во чест на големиот уметник своја верзија на неговата „Ода на радоста“ снимија уметниците Ѓоко Танески и Жармена Китрозоска, како и изведба на охридскиот мешан хор „Вокс Лихнидос“.
Кон одбележувањето на јубилејот се вклучија и учениците од Музичкото училиште „Методиј Патчев“ од Охрид, а во рамки на активностите на фасадата на нивното училиште е исцртан графит со ликот на големиот уметник.
Лудвиг ван Бетовен е еден од најпознатите светски композитори од периодот на класицизмот и раниот романтизам. Роден е во декември 1770 година во семејство со холандско потекло, а живеел и кариера направил во Виена. На само 30 години почнал да го губи слухот, а потполно оглувел на 46 години. Последните десет години од животот компонирал целосно глув, напротив некои од неговите најпознати дела се токму од тој период од неговиот живот.