Жени битолчанки, борци со болеста рак со која лично се соочиле, синоќа одиграа документарна теарска претстава во која на свој и оригинален начин ја презентираа својата борба со рак на дојка.
Во театарската претстава учествуваа битолчанките Невена Стерјевска, Катерина Петровска, Трендафилка Киклевска и Зорица Цибалевска, жени кои никогаш не биле акерки, а кои со битолската публика ја споделија личната борба против рак на дојка и рак на матка, а Цибалевска посебно беше фокусирана на пораките од нејзината мајка Летка Андреевска која го загуби животот во борбата против болеста рак.
-Театарскиот проект беше во функција на подигнување свест за редовни прегледи и брзо дијагностицирање на болеста рак која за жал во голем обем и бројка е застапена во пелагонскиот регион. Во претставата говоревме за искуствата, за борбата против самата болест, но и депресијата која се јавува кај секоја жена кога се соочува со оваа болест. И, конечно како жени од секојдневието, а не професионални актерки, сакавме да посочиме дека борбата е можна ако решително се води, истакнаа учесничките во претставата „Жени“, по синоќешната документарна театарска премира во Битола.
Стручно оформување на претставата изврши Софија Ристевска-Петрушева, професионален театарски режисер и основач на „Интимен Театар“ и хотел „Театар“ каде се одигра претставата, и каде функционира здружението за поддршка на жени болни од рак во Битола – „Одраз“.