Претставата „Жорж Данден“ на Патувачкиот театар „Поклони се и падни“ од Вевчани, која претходно доживеа неколку успешни изданија низ Македонија, вечер ќе биде прикажана пред скопската публика во Драмскиот театар.
Драмскотото дело, на текст од Молиер, а во режија на Ѓорѓи Ризески, е сработено по вевчанскиот рецепт со сценографија типична за животот од тој крај, со актерска игра, говор и хумор зачинет со вевчански белег. Преку ликот на Жорж Данден, младиот режисер Ризески ја испраќа пораката за животот, но и дилемата – колку сме подготвени да ги прифатиме промените.
– Пораката е токму тоа, да се чуваат сите луѓе од оние кои прават маски, кои пробуваат да ја цицаат крвта од нивните џебови. Животот секогаш продолжува што и да се случи и покрај тоа што семејството повеќе не може да се сочува, вели Ризески.
Вевчани е позната општина каде се негува најдолгата традиција на карневалот, исмејувањето, сатирата. Вевчанци велат дека сето тоа се должи на нивната уникатност.