Унгарскиот фолклорен ансамбл „Сегед“ одржа концерт во Домот на култура „Илинден“ и со својот настап пред публиката го прикажа методот на пренесување на културното наследство преку народни танци, популарен во Унгарија, а што се наоѓа на листата на УНЕСКО. Покрај концертот, публиката имаше можност да ужива и во презентација на народните носии, инструменти и унгарскиот јазик.
Дел од публиката беа унгарскиот конзул Сашо Јанакиевски, градоначалникот на општина Илинден Жика Стојановски и претставници од унгарската заедница.
Фолклорниот ансамбл „Сегед“ е основан во 1955 година и е најстариот ансамбл кој има водечка улога во културниот, образовниот и уметничкиот живот во градот Сегед. Иако програмата на фолклорниот ансамбл има образовен карактер и во ансамблот претежно членуваат млади луѓе, сепак нивните концерти се наменети за сите генерации.
Танцовата група „Сегед“ веќе 20 години редовно организира меѓународни фолклорни фестивали и форуми и редовно учествува во национални и меѓународни престижни професионални фестивали и досега се има закитено со многу награди и признанија. Свои турнеи имале низ цела Европа, Алжир, Кореја, Египет, Јапонија и Канада.