„Танец“ и „Ладо“ под ѕвезденото небо на Античкиот театар

Од:

Во рамките на офф-програмата на фестивалот „Охридско лето“ синоќа на Античкиот театар во Охрид се одржа целовечерен концерт на ансамблите на народни игри и песни „Танец“ од Република Северна Македонија и „Ладо“ од Хрватска.

Ноќта насловена како „Танец и Ладо под ѕвездите“ донесе дел од богатата ризница на двете земји преку вокално-инструменталната музика и народните танци што како подвижни музеи ги изведуваа двата професионални ансамбли.

-„Танец“ и „Ладо“ се две различни естетики и интересно е да се види тој контрапункт помеѓу нив. Публиката го виде хрватскиот фолклор кој и заради поднебјето и заради процесите што се одвивале, дише со една елеганција, со една прочистена песна, игра и свирка, како и македонскиот фолклор преку „Танец“ кој е фуриозен и полн со набој, рече уметничката директорка на „Танец“ Бранка Костиќ-Марковиќ.

Според неа, „Танец“ самиот по себе е изненадување особено што концертот се случува после долга пандемиска пауза.

-Сите вработени се со еден посебен набој во што се уверивме на претходните концерти. Овој циклус концерти почна во Струмица каде што „Танец“ сам се претстави под отворено небо. Тоа е проектот „Танец под ѕвездите“ со три големи концерти, во Струмица, како и во Битола и во Охрид каде што настапивме заедно со ансамблот „Ладо“ кој по 19 години пауза повторно остварува соработка во нашата земја, дополни Костиќ-Марковиќ.

Како што појасни таа, „Танец“ етапно почна да се враќа на сцената со оркестарот и хорот.

-Поминавме пет градови во земјава и уште таму се виде колку им недостасувала музиката и на музичарите и на публиката. Не е нескромно да се каже дека „Танец“ повеќе од седум децении постои и воодушевува насекаде во светот. Тој е подвижен музеј и вистински амбасадор на македонската ризница, рече уметничката директорка на ансамблот Бранка Костиќ-Марковиќ.

И хрватскиот фолклор преку членовите на „Ладо“ на сцената на Античкиот театар привлече огромно внимание кај публиката.

– Ансамблот „Ладо“ како единствен професионален фолклорен ансамбл по 19 години е повторно во Република Северна Македонија и настапува со нашите драги пријатели и соработници од „Танец“. Сакавме да донесеме комбинација од вокално-иструментална и танцова програма од различни краеви на Република Хрватска, рече директорката на ансамблот „Ладо“ Илеана Јурин Бакотиќ.

Концертот на професионалните ансамбли „Танец“ и „Ладо“ што се одржа во организација на „Охридско лето“ имаше хуманитарен предзнак. Собраните средства од продажбата на билети ќе бидат донирани за потребите на здравствениот систем.

Би можело да ве интересира

Спуштена завесата на 61-то „Охридско лето“

Ана Ололовска

Претставата „На отворено море“ на Југословенскиот драмски театар од Белград за затворање на „Охридско лето“

Ана Ололовска

Претставата „Мојот маж“ на Југословенското драмско позориште од Белград вечерва на програмата на „Охридско лето“

Ана Ололовска

„Лирска вечер“ на „Охридско лето“ со македонски солисти

Ана Ололовска

МНТ и режисерот Неќак донесоа нов театарски израз на „Охридско лето“

Концерт на „Синтезис“ на Античкиот театар за 61-от роденден на „Охридско лето“