Самурајскиот филм „Пурпур и злато“ (Purple and Gold) по сценарио на македонската режисерка Андријана Цветковиќ освои прва награда во категоријата краткометражен игран филм на фестивалот IAFOR – FilmAsia Open Film Competition 2012.
Сценариото на филмот победи на интернационален конкурс за краткометражен филм што го организираа филмските студија во Јапонија, и беше снимено во познатото филмско студио Шочику во Кјото во 2010 година како самурајски филм (јидаигеки-посебен филмски жанр во Јапонија).
– Овој жанр се смета за еден од најтешките за снимање, па од тие причини ретко се избира сценарио напишано од автор кој не е од Јапонија. Снимен е на јапонски јазик, со интернационален продукциски тим и видни јапонски актери. Постпродукцијата на филмот заврши во 2011 и премиерно беше прикажан на Интернационалниот филмски фестивал Хисторика во Кјото. Приказната е инспирирана од Македонија, со мотиви блиски до светот на македонските легенди и митови, изјави режисерката Цветковиќ.
Таа е и доктор на науки од областа на филмската уметност. Седум години живее во Јапонија, а од оваа година ќе биде визитинг-професор и научен соработник на престижниот Кјото универзитет, во Центарот за азиски студии.