Промоција на книгата „Скопски разговори“ од Свето Стаменов и Милан Јазбец

Од:

Во чест на 30-годишнината од независноста на Северна Македонија и на Словенија, вечер во Домот на културата „Илинден“ во истоимената населба ќе биде одржана промоција на книгата „Скопски разговори“ на Свето Стаменов, политиколог, новинар на Македонското радио – Радио Скопје и еден од најплодните македонски публицисти, и проф. д-р Милан Јазбец, поранешен амбасадор и еден од најпознатите словенечки дипломати, универзитетски професор, писател и поет.

Книгата „Скопски разговори“ претставува своевидна збирка од 20 радио – интервјуа реализирани во рамките на редовните програми „Актуелно“ и „Радио спектар“ на Македонското радио – Радио Скопје од март 2018 до август 2020 година, односно во еден од несомнено најинтензивните периоди во македонската внатрешна и надворешна политика, исполнет со многу предизвици и искушенија како на внатрешно – политички, така и на меѓународен план. Впрочем, тоа е периодот на македонската демократска трансформација, на забрзано отворање кон светот како резултат на новата македонска надворешна политика и на интензивирање на македонските евро и евроатлантски интегративни процеси, кои во март 2020 година резултираа со полноправното членство на Република Северна Македонија во НАТО. Амбасадорот Јазбец не само што беше непосреден сведок, туку и активен учесник во некои од тие историски процеси.

Дел од интервјуата се посветени и на литературното творештво на Јазбец и на неговата активност како промотор на тнр. културна дипломатија и на развојот на македонско – словенечките културни врски, за што најдобро говорат престижното Почесно Рациново признание за афирмација на македонската култура и јазик во странство за 2019 година и македонските изданија на неговите дела „Мартин Крпан – дипломат и воин“, „Виножитото над душата“ и „Сјајна ѕвезда со лавовска грива“. Покрај тоа, неговите скопски години беа одбележани и со голем број културни настани во кои тој беше активен учесник, но и со голем број авторски текстови и есеи. Токму затоа и вториот дел на „Скопски разговори“ е посветен на неговите скопски есеи, во кои доминираат есеите за првата македонска поетеса Даница Ручигај, за уметниците Јоже Циуха и Мице Јанкуловски и за великанот на современата македонска култура Блаже Конески.

Промотори на книгата „Скопски разговори“ на Свето Стаменов и проф. д-р Милан Јазбец ќе бидат проф. д-р Трајан Гоцевски, универзитетски професор, министер за одбрана во првата Влада на независна и суверена Република Македонија и актуелен член на Советот за безбедност, Раде Силјан, поет, есеист, критичар и преведувач и Зоран Иванов, новинар и публицист, а со пригодни беседи ќе се обратат Милан Предан, словенечки амбасадор во Република Северна Македонија и градоначалникот на Општина Илинден, Жика Стојановски.

Промоцијата на „Скопски разговори“ ќе биде организирана според сите протоколи и мерки за заштита од Ковид-19.

Би можело да ве интересира

На Филолошкиот факултет „Блаже Конески“ се одбележува „Недела на италијански јазик во светот“

Ана Ололовска

Распишан конкурсот за најдобар дебитантски прозен ракопис „Новите!“

Ана Ололовска

Романот „Птиците умираат пеејќи“ објавен на македонски јазик

Ана Ололовска

Рокот за учество на Меѓународниот фестивал на кратки книжевни форми трае до 15 октомври

Ана Ололовска

Објавена книгата „Кутија“ од грчкиот автор Константинос Пацарос

Ана Ололовска

Онлајн промоција на „Сантос блуз“ – првиот роман на Ненад Алексовски

Ана Ололовска