Во Домот на култура во општина Илинден денеска е отворен 14-та литературна манифестација „Илинден 2013“.
Посетителите на оваа манифестација, што ја отвори градоначалникот на општина Илинден Жика Стојановски, можат да најдат многу нови наслови од домашни и странски автори, современи и класични литературни дела, стручна научна и белетристичка литература, енциклопедии и дела од областа на културата и уметноста.
Во рамки на манифестацијата што ќе трае до 31 мај, ќе има повеќе промоции на книги. Утре ќе биде промовирана книгата „ВМРО 1893-1903 Поглед низ документи“ на Ванчо Ѓорѓиев, а задутре романот на најчитаниот американски автор во светот Халид Хосеини „И планините одекнаа“.
Централниот дел од манифестацијата, поетскиот митинг „Ветерот донесе убаво време“, ќе се одржи во Домот на култура „Илинден“ на 30 мај со почеток во 20:00 часот, со настап на поети-претставници на младата книжевна генерација на Република Македонија. Притоа ќе бидат промовирани 10 книги од млади автори објавени во периодот мај 2012-мај 2013 година. На 30 мај напладне ќе се одржи и традиционалното Литературно матине за деца, на кое ќе настапат повеќе детски писатели.