Фестивалот на комедијата „Гола месечина“ беше отворен синоќа, при што публиката уживаше во претставата „Чао пријатно“ во која глумат актерите Тино Костадиновски и Атанас Атанасовски.
Како што информира денеска Општина Аеродром, Фестивалот за отворен го прогласи претседателката на Советот на Општина Аеродром, Ивана Цветковска, а се обрати и директорот на „Театар Комедија“, Сашо Ристовски.
„Гола месечина“ ќе трае до 3 октомври, а оваа година се одржува на фудбалското игралиште покрај градинката „Сонце“ во Реонски центар, според сите утврдени протоколи за организирање манифестации од отворен карактер.
Сите претстави ќе почнуваат во 20 часот, а вратите за влез на публиката ќе бидат отворени од 19 часот. Оваа година влезот е со карти, кои се бесплатни и во ограничен број, а нивното подигнување се врши од билетарницата на СЦ „Јане Сандански“ од 10:00 до 14:00 часот секој ден за претставите што се на репертоар за тој ден. Едно лице може да подигне две карти со лична карта за една претстава.
Вечерва на репертоар е претставата „Партија реми“ во која играат актерите Ѓокица Лукаревски и Маја Вељковиќ.