Во рамки на манифестацијата Мајски оперски вечери утре ќе биде промовирано делото „Од Моцарт до мобилните телефони“ на продуцентот Крсто Скубев.
Книгата е културолошка студија за влијанието на мас медиумите во обликувањето на музичкиот производ и одразот врз консументите.
Според рецензентот Александар Прокопиев, вредноста и актуелноста на ова дело се во специфичната согледба на авторот кој успеал во оваа културолошка тема за најуниверзалната, најраспространетата и најконсумирана уметност да го извлече есенцијалното од односот дело – публика низ историските периоди, од почетоците па сè до најновата епоха, која може да се означи како мас-медиумска.
Скубев е дипломиран продуцент на Факултетот за Драмски уметности – Скопје и м-р по културологија.
„Од Моцарт до мобилните телефони“ е во издание на Дирекцијата за култура и уметност на Скопје, а ќе ја промовираат проф. д-р Александар Прокопиев-рецензент и музикологот Марко Коловски.