Издавачот ПНВ Публикации ја објави збирката раскази „Ќерката на надреалистот“, што е прв превод на македонски јазик од естонската поетеса и прозаист Кристиина Ехин. Авторка на преводот е Јулијана Величковска.
Издавачот соопшти дека делото на Ехин е „подеднакво современо и древно, естонско, но и светско, женско, но и човечко“. Во расказите таа пишува за врските меѓу луѓето, љубовта и бракот од перспектива на современа жена. Ликовите се, главно, митолошки суштества или луѓе со надреални моќи и способности да се претвораат во животни и предмети, а преку нив авторката со леснотија ги изразува емоциите на современите жени.
– Зборува за љубов, болка, осаменост и отуѓување. На многу невообичаен начин таа ги раскажува приказните, почнувајќи од моментот „и си живееја среќно засекогаш“, таа пишува за тоа како понекогаш љубовта и не е доволна и како луѓето што се сакаат умеат најмногу да се повредат меѓу себе, водени пред се од својот егоизам. Нејзиниот стил е лесен, на места е и особено хумористична, па дури и саркастична, без при тоа да се наруши длабочината на нејзините мисли и приказните кои имаат скоро митолошки призвук. Ова е четиво кое ќе ве замисли, но и ќе ве забавува. Се чита брзо, па е идеално четиво за современиот читател, информира ПНВ Публикации.
Кристиина Ехин (Рапла, Естонија 1977) дипломирала компаративен и естонски фолклор на Универзитетот во Тарту. Досега има објавено шест поетски книги и три книги со кратки раскази. Пишува и игра аудиовизуелни драми. Нејзиното творештво е преведено на англиски, германски, шведски, руски, фински, латвиски, словенечки, удмурт, коми, словачки, полски, норвешки, ирски, велшки, келтски, унгарски и исландски јазик. Добитник е на голем број награди, меѓу кои: најпрестижната естонска награда за поезија од страна на Културното биро на Естонија – за книгата „Тапани на тишината“; наградата „Попеску“ за најдобра европска поезија во препев на англиски јазик; почесната награда за Млад културен работник, доделена од претседателот на Естонија; наградата „Ела ја Сара“ од Културното биро на Естонија.