Годинашни добитници на Меѓународната награда „Ана Франк“ се авторите Мирјана Стакиќ и Зоран Пеневски, двајцата од Србија и Алтенка Сапунџиева од Бугарија.
Наградата востановена од Издавачката куќа Феникс и Фондацијата за културна и научна афирмација и презентација Македонија презент од Скопје, како што соопштуваат, се доделува за нивниот севкупен книжевен придонес, особено на планот на културната соработка и размена на литературите на Балканот.
Проф.др Мирјана Стакиќ е родена во 1973 година во Владичин Хан (Србија). Живее на Златибор и работи како вонреден професор на Педагошкиот факултет во Ужице (Универзитет во Крагуевац). Нејзината поезија е преведена на повеќе јазици, а романот Приказната на Ана е објавен во Америка и Турција. Автор е на голем број учебници, монографии, научни и стручни трудови. Член е на Здружението на писателите на Србија.
Алтенка Сапунџиева (уметнички псевдоним Латинка Златна) е родена во 1957 година во Ловеч (Бугарија). Има објавено десет стихозбирки и една прозна книга. Преведува од македонски, српски, босански и хрватки јазик и досега има преведено над 50 автори. Нејзините стихови се преведени на голем број јазици и добитник е на повеќе награди и признанија. Член е на Сојузот на бугарските писатели.
Зоран Пеневски е роден во 1967 година во Панчево (Србија). Тој е автор на повеќе романи, вклучувајќи и графички романи, сценарист и преведувач. Пишува за деца и млади. Живее и работи во Белград. Автор е на романите: Помалку битни злосторства, Траги на отсуството, Полноќ на твоите раце и Лектор, како и на повеќе графички романи. Има преведено над 50 книги од англиски, германски и македонски јазик. Неговите дела, исто така, се објавени во странство – на англиски, француски, холандски и на македонски јазик.