Кумановскиот театар вечер од 20 часот премиерно ќе ја изведе претставата „Недоразбирање“ од Албер Ками, во режија на Драгана Таневска.
Се работи за семејна драма за индивидувалните желби на поединци и нивното влијание врз хармонијата во семејството, во кое се следи загубената човечност поради загубена љубов, борбата за соништата и идеалите, бришењето на моралните граници.
– Ова е претстава која му се обраќа на модерниот човек, кој во трка да ги исполни своите желби заборава на суштината. Претставата има убава енергија, јас сум многу задоволна од процесот, а тоа ќе го види и публиката, изјави режисерката Таневска.
Во претставата играат актерите Александра Михајловска, Кети Дончевска-Илиќ, Никола Наковски, Сања Русеска и Марко Трајковиќ.
По вечерашнава премиера, претставата репризно ќе биде изведена утре и задутре од 20 часот.