Регионалната комора на занаетчиите и Здружението на ракотворци од Битола денеска и утре на плоштадот „Магнолија“ ја организираат традиционалната изложба на стари фотографии и ретки занаетчиски производи.
Според Ѓорги Кочовски, претседател на регионалната комора на занаетчиите, традицијата е најдобриот начин да се потсетува на занаетчиството но и да се одржуваат занаетите како врвно мајсторство и заштитен знак на многу битолски семејства.
– Занаетчиството исчезнува но не оди во заборав. Се додека има занаетчии ќе има и занаетчиство, а манифестацијата што ја нудиме на битолчани, но и гостите на градот е токму за тоа, за да потсети на големата традиција бидејќи традицијата е најдобриот начин да се потсетува на занаетчиството, но и да се одржуваат занаетите како врвно мајсторство и заштитен знак на многу битолски фамилии. Потврда за тоа се старите фотографии на занаетчиите од старата битолска чаршија, бројните грнчарски производи, предмети од резба и други разчни изработки од ова поднебје, истакна Кочовски.
На изложбата на стари фотографии и ретки производи се претставуваат околу 20 битолски занаетчии кои како и минатата година учествуваа во рамките на програмата на фестивалот „БитФест“.