Во Националната галерија „Чифте амам“ вечер ќе биде отворена изложбата „И во огнот штом ќе запролети“ од Перица Георгиев-Пепси, која претставува неформална камерна ретроспектива на дела од периодот на неговото делување од крајот на минатиот милениум.
Перица Георгиев-Пепси е роден во 1957 година, во Скопје. Израснал во семејство коешто ја поддржувало неговата индивидуалност насочена кон светот на боите, звуците, вибрациите – „невидливата“ суштина на надворешното, видливото и негова репродукција на хартија. Затоа е природен патот на неговото насочено образование, прво во Средното уметничко училиште, а потоа и на Факултетот за ликовни уметности во Скопје каде дипломира во 1987 година.
Во 1984 година неговите први настапи се со групата „Зеро“, во која учествуваат повеќе уметници и музичари. Заедно излагаат во полето на колажот, инсталацијата, анимацијата, видеото, музичките и мултимедијални хепенинзи. Оваа група се појави како своевиден андерграунд одговор на тогашната уметничка сцена, воспоставена во социјалистичкиот режим на СФРЈ.