На една од зградите во средината на градското шеталиште во Гевгелија се изработува мурал чиј идеен автор е гевгелискиот уметник Миле Ничевски.
Тој, заедно со уметникот Милош Стојановиќ од Скопје, вредно работи на ова дело,кое е селектирано од Министерството за култура, да биде готово до прославата на општинскиот празник 7-ми Ноември.
– Се работи за композиција наречена ,,Бакнеж“ која беше на насловната страна на најпознатото македонско авангардно списание ,,Маргина“ како и на плакатите и картичките на мојата самостојна изложба на цртежи во Белград. Тоа е дел од трилогија во која е замислено да се реализираат мурали уште во градовите Струга, Битола и Скопје кои како и Гевгелија имаат арт фестивали, рече Ничевски.
Покрај сликарство, авторот Миле Ничевски се занимава со изработка на графика, цртеж, стрип, театарска режија и дизајн. Магистрант е на визуелни комуникации на Европскиот универзитет, постдипломец во Париз и поранешен директор на Домот на културата во Гевгелија.