Две илустрирани книги за деца „Рисот Ристе и пријателите од Африка“ и „Рисот Ристе и пријателите од Јужна Америка“ од авторката Весна Костантинова денеска беа промовирани во Скопје.
Книгите, објавени на македонски и албански јазик, се наменети за деца од предшколска и школска возраст преку кои тие се запознаваат со дел од убавините на државата, со недопрената природа, планините и езерата, но и со секојдневните проблеми кои и се закануваат, особено со неодговорното фрлање на сметот.
Книгите, како што посочи авторката, се и корисна алатка за поттикнување на поголема интеракција и разговор меѓу детето и родителот или старателот и воспитувачот во цел поголема едукација, информираност и градење на чувство на одговорност за своите постапки и за сопственото здравје, со посебен акцент врз здравата исхрана. Истовремено во книгата се провлекуваат морални пораки за истрајноста, упорноста, самодисциплината, помагањето, неоткажувањето итн.
– Главната цел е да ја поттике љубопитноста кај децата, да ја разгори желбата за стекнување на нови знаења и да им помогне да израснат во здрави и одговорни личности. Истовремено делата имаат за цел и да влијаат врз создавањето и негувањето на чувството на припадност и идентитет, но и за прифаќање на различностите и пронаоѓање на заедничките особини со другите. Голем акцент е ставен на другарувањето, заедништвото, взаемното почитување и помагање, вели авторката Констатинова.
Книгите може да се купуваат по симболична цена од 150 денари.