Во МПЦ „Света Богородица“ во Кембриџ, Онтарио, Канада, вчера беше промовирана книгата „Macedonians in the World“ (Македонците во светот) од Славе Катин, во која е претставен развојниот пат на македонското иселеништво, што се совпаѓа со развојот на настаните на Балканот и бил во зависност од настаните во Македонија.
-Како резултат на тоа, преселничките печалбарски движења на Македонците и нивниот интензитет биле условени, пред сè од тешките економски услови за живеење и работа, а во многу помалку случаи и од причини што имаат национално-политички карактер. Тешките, лоши, често и невозможни услови за живеење и постојаната борба за опстанок присилиле голем број Македонци да се определат, покрај другото, и за преселби во многу земји во светот, посочил на промцијата на книгата Петар Медичков, претседател на МПЦ „Света Богородица“.
Во публикацијата е потенцирана и улогата на македонските православни цркви и црковни општини, клупски и други асоцијативни облици на собирање во прекуморските и во европските земји.
Покрај оваа книга, во МПЦ „Света Богородица“ во канадски Кембриџ вчера е промовирана и книгата „Александар III Македонски“ од Славе Катин и коавторот Георги Бранов кој педесетина години живее во Канада.