Во организација на Домот на култура „Кочо Рацин“ – Скопје беше реализиран проектот „Млада македонска драматургија“ – драмско читање на пет драмски извадоци од пет млади македонски драматурзи: Стефан Марковски, Мона Паскалова, Марина Трајковска, Артин Селмани и Јован Саркањац.
Во извадоците, како што соопшти организаторот, кои беа читани од актерите Теоман Максут и Благица Димитровска, провејуваат урбани теми со различно обработени конфликти на релација машки-женски ликови.
Проектот беше реализиран во две фази, односно беа снимени видеа од настапот на актерите во просториите на Домот и од драмското читање од отворен тип реализирано преку зум платформата.
Текстовите на Трајковска, Селмани, Саркањац, Паскалова и Марковски беа читани пред две години во Софија од поранешни или актуелни студенти на НАТФИЗ (Национална академија за театарска и филмска уметност), а целиот настан беше проследен со голем интерес од софиската публика.
-Секој од петте текста одразува длабоко лична авторска драмска поетика, но она што ги поврзува во единство е нивната урбаност и разработена психологија, односно развојност на конфликтите кои во сите пет случаи се врзуваат за машко-женските контрастно поставени светови, љубовните триаголници, длабински понирајќи до суштествената дихотомија во перцепциите за Ерос и Танатос, се вели во соопштението.