На 2 март во Македонската опера и балет ќе биде доделена првата награда „Виртуози“ што ја иницираа Сојузот на композиторите на Македонија (СОКОМ), Македонската филхармонија и Македонската опера и балет.
Номинирани се по три уметници, ансамбли или манифестации од музичко-сценската уметност во десет категории, а за наградените ќе одлучува 11-члено стручно жири – музички и балетски уметници, педагози и теоретичари. Наградата е статуетка од авторката Виолета Коцев, која беше избрана на конкурс.
Претседателот на СОКОМ Сони Петровски денеска на прес-конференција информираше дека за категоријата „Музички организатор“ се номинирани националните установи Македонска опера и балет, Македонска филхармонија и Охридско лето.
Во категоријата „Камерен ансамбл“ номинирани се Дуо Кировски, Мјузик прогресив квартет и Трио интерарт. Во „Музички публицист“ се Аида Ислам, Марко Коловски и Васка Наумова-Томовска. Во категоријата „Млад музички уметник“ номинирани се пијанистот Дино Имери, харомоникашот Александар Коловски и виолинистката Софија Никоска.
Во категоријата „Голем ансамбл“ се Македонската опера и балет, Македонската филхармонија и Мешаниот хор „Драган Шуплевски“.
Во категоријата „Музичка манифестација“ ќе се натпреваруваат Денови на македонската музика, Охридско лето и Скопско лето. Во „Музичко-сценски уметник“ номинирани се сопраните Ана Дурловски и Весна Ѓиновска-Илкова и балерината Александра Мијалкова, а во категоријата „Композитор“ – Дарија Андовска, Фатос Лумани и Александар Пејовски.
Во „Меѓународна афирмација“ номинирани се Ана Дурловски, Благој Нацоски и Симон Трпчески, во категоријата „Музички изведувач“ – пијанистките Марија Вршкова и Ана Гацева и виолинистот Љубиша Кировски.
– Целта на наградата „Виртуози“ е да им се даде признание на уметниците, а сите други уметници да се поттикнат за креативни проекти. Целта е и да се афирмира класичната музика која има минимален простор во медиумите, рече Петровски.
Номинациите ги испратиле околу 15 институции. Во сите категории имало по петнаесетина предлози, а најмногу 25.
Влезот за манифестацијата идната сабота, кога првпат ќе биде доделена наградата „Виртуози“ во 10 категории, ќе биде бесплатен, со претходна резервација во СОКОМ.