„Дневници на една љубов“ е нов роман на Лилјана Пандева, кој деновиве го објави „ПНВ Публикации“. Според рецензентот, проф. д-р. Наташа Аврамовска, се работи за „книга за љубовта во услови на гранична или кризна ситуација“.
– За љубов проткаена низ дневнички монолошки исписи – изрази на една деценија нестивнат љубовен копнеж, постојано одново упатуван и еднакво копнежлив во скритоста, љубов низ три времиња, развивана во лавиринтите на факцијата и фикцијата, на сладоста и копнежливоста, извлечена од социјалната стварност и колегијалните односи во секојдневието, од грдотијата и хаосот на војната, наведува рецензентката Аврамовска.
Лилјана Пандева (1964, Ново Село, Струмица) е дипломиран професор по литература и македонски јазик и доктор по филолошки науки. Досега ги објавила делата: драмолетите за деца „Новогодишни едночинки“; расказите „Канцелариски колумни“; стихозбирката „Љубов од А до Ш и обратно“; романите „Од агендата на Калина Калин“ и „Возовите на Луцерн“ (преведени и објавени на германски јазик), како и романот „Доилката“, добитник на наградата „Стале Попов“ во 2016 година.