Македонската пливачка Анастасија Богдановски по последниот успех остварен на Гран При Шарлот во САД, кој претставува квалификациски натпревар за Светското првенство во 2015 во Казан, Русија се стекна со стипендија од меѓународна категорија од Агенцијата за млади и спорт (АМС).
Со оствареното време од 0.56.61 на 100 метри слободно што претставува и апсолутен рекорд на Македонија, таа во наредните две години ќе прима стипендија од Агенцијата за млади и спорт во вредност од 1,3 просечни плати месечно.
Анастасија Богдановски е членка на пливачкиот клуб Вардар од Скопје и тренира под раководство на тренерот Боро Блажевски. Нејзина наредна цел е пласман на Олимписките игри. Иако на пливачите им следува вајлд-карта, таа сака да оствари норма за Рио 2016.
Последниот број на едно од најчитаните пливачки он-лајн списанија СВИМСВАМ во САД ја претстави Анастасија како едно од водечките имиња во пливањето кое допрва се очекува да руши рекорди.