Словенечкиот претседател Борут Пахор изјави дека дури во саботата дознал оти Словенија е ставена на листата американски сојузници за борба против групата Исламска држава и оцени дека за учество во акциите против терористичката организација потребен е мандат на Советот за безбедност на Обединетите нации.
– Голем е ризикот доколку таквите акции се преземаат без потребниот мандат на ОН, рече Пахор во Њујорк, каде се одржува генералната дебата на 69. седница на Генералното собрание на ОН.
Словенечкото Министерство за надворешни работи кон крајот на неделата, коментирајќи го вклучувањето на државата на листата на Стејт департментот, наведе дека учеството на Словенија во вооружените операции против ИД „не е веројатно“, но оти Љубљана е подготвена да придонесе во хуманитарните и други акции против џихадистите.