„Младински културен центар – Битола најостро ги осудува лажните тврдења, невистини и клевети искажани на прес конференцијата на здружението на граѓани „Стоп операција Сорос“ на ден 04.02.2017 година и во целост ги отфрла како неосновани, злонамерни и неточни.
На прес конференцијата беше искажана лажната изјава на Цветин Чилиманов дека „…нивна цел е да учествуваат на протести и дебати организирани од СДСМ и да обезбедуваат партиски војници за митинзи и за шарената револуција…“. Воедно, беа споменати неточни високи суми на префрлени средства од страна на Фондацијата отворено општество Македонија на сметката на МКЦ-Битола, наводно за предизборни активности. МКЦ-Битола со индигнација го отрфла и искажаното тврдење дека сме „НВО под капата на ФООМ“.
Младинскиот културен центар – Битола во 2017 година ќе слави јубилеј – 20 години од своите почетоци како неформална група и 18 години од официјалното постоење. Визијата, мисијата, вредностите и принципите на работа на МКЦ – Битола остануваат непроменети. Организацијата и понатаму транспарентно и одговорно, во соработка со своите поддржувачи и партнери, ќе работи на својата визија за развој на демократско општество во кое младите се лидери на прогресот. МКЦ-Битола добивала и добива поддршка од преку 20 донатори од земјата и странство и никогаш не била зависна само од еден донатор.
Мисијата на организацијата е обединување и развој на креативните потенцијали на младите луѓе и поттикнување на граѓанскиот активизам. Долгорочни цели на МКЦ – Битола се да го промовира волонтерството, да го афирмира неформалното образование, да ги развива демократијата и граѓанското општество и да ја поддржува урбаната култура.
Проектите и активностите на МКЦ-Битола се исклучиво во насока на остварување на стратешките цели на организацијата, а не во функција на било каква политичка агенда на било која политичка партија во Република Македонија.
МКЦ – Битола води и координира проекти и програми поврзувајќи ги младите преку вклучување во активности што ги истакнуваат нивните потенцијали во областа на волонтерството, неформалното образование, граѓанските иницијативи и урбаната култура. МКЦ – Битола веќе девет години работи како национална канцеларија на неформалната мрежа на локални волонтерски центри, Волонтерски центар на Македонија. Центарот ја координира размената на волонтери на локално, регионално и меѓународно ниво, едуцира волонтери, нуди консултативни услуги на други субјекти и соработува со други локални и интернационални организации, кои промовираат слични вредности.
Во рамките на МКЦ – Битола функционира тренинг сервис преку кој континуирано се реализираат голем број на локални, национални и меѓународни обуки за развој на вештини, знаења и компетенции кај младите луѓе. Вклучени сме и во развој и промоција на политики и стратегии на национално и локално ниво во полето на промоција на неформалното образование кај младите, развој на волонтерството и волонтерските вредности и промовирање на младинската работа. МКЦ-Битола е овластено здружение за давање на претходна правна помош и официјален младински УНЕСКО клуб.
На крајот, Младински културен центар – Битола за изречените невистини и клевети бара јавно извинување од здружението „Стоп операција Сорос“ во рок од 7 дена. Во спротивно, ќе покренеме соодветна тужба за навреда и клевета пред надлежните судови во Република Македонија“, се вели во демантот на Младински културен центар Битола.