Металург денеска на прес-конференција објави дека ја продолжува соработката со македонски репрезентативец Филип Кузмановски. Со новиот договор Кузмановски се обврза на верност кон македонскиот вицепрвак до 2019 година.
– Ја продолжуваме традицијата да ангажираме млади играчи, а еве сега и ги продолжуваме договорите со нив. Се обидуваме да ја стабилизираме екипата и сите тие млади ракометари кои се и репрезентативци на Македонија да ги задржиме во клубот за да го подигнеме и нивниот и нашиот квалитет. Во нашите планови се секако и договори со играчи кои се дел и од нашата втора екипа. Лино Червар има голема заслуга за оваа проекција, како и директорот на клубот Ванчо Димовски, изјави Зоран Цветановски, новиот претседател на клубот.
Кузмановски изрази задоволство што го продолжи договорот со клубот од Автокоманда.
– И покрај неколкуте опции каде да ја продолжам кариерата се одлучив за Металург, бидејќу тука сум задоволен и очекувам уште да напредувам, рече Кузмановски.