Компјутерски хакер се здобил со електронски писма, снимки, приватни телефонски броеви и адреси на членови на семејството Буш и нивни пријатели, меѓу кои и материјали на двајцата поранешни претседатели -Џорџ Буш постариот и неговиот син, пренесоа американските медиуми.
Сајтот „Smoking Gun“ соопшти дека хакерот, кој бил активен на мрежата под псевдонимот „Гуцифер“, се здобил со снимка на 88-годишниот Буш постариот од неговиот престој во болницата во Хјустон, каде тој недоамна лежеше со бронхијална инфекција.
Оваа снимка и другите материјали, поврзани со семејството Буш, беа ставени на посочениот сајт, но неговата автентичност засега не е потврдена, посочуваат американските медиуми.
Џим Макграт, портпарол на Џорџ Буш постариот, изјави дека заради случајот е почната кривична истрага, но не сакаше да ги коментира информациите на сајтот.
Од канцеларијата на Буш помладиот одбија вооошто да го коментираат случајот, а од канцеларијата на ФБИ во Хјустон ниту потврдија, ниту демантираа дали има истрага.
„Smoking Gun“ го опишува Гуцифер како хакер со долгогодишно искуство, кој неодамна упадна и во владини сајтови.