Американската компанија Џенерал моторс повлекува 207.766 возила на сервис во Кина поради проблеми со сопирачките, соопшти денеска надлежната кинеска институција.
Програмата за сервисирање ќе почне од 15 јуни, а на поправка се повлекуваат автомобили од луксузниот седан модел „Бјуик лакрос“, произведени во периодот од 11 јануари 2006 до 1 септември 2009 година.
Компанијата ќе изврши бесплатна замена на неисправните делови на сопирачките и ќе ги елиминира постоечките неправилности на свој трошок.
Автомобилите што се повлекуваат, се произведени во одделение на компанијата во Шангај, основана во 1997 година. Џенерал моторс моментално има три фабрики во Кина и ја завршува изградбата на четвртата.