Депонијата „Дрисла“ ќе работи според стандардите на италијанската депонија „Белведере“ со што отпадот ќе се селектира и ќе се трансформира во енергија или гориво и репроматеријал, секундарна суровина, а со тоа драстично ќе се намали количеството отпад.
Градоначалникот на Град Скопје, Коце Трајановски, денеска во Фиренца, потсети на потпишаниот договор за концесиска дејност со италијанските фирми и ЈП „Дрисла“ во траење од 35 години.
Соња Лепиткова, државен секретар во Министерството за животна средина и просторно планирање изјави дека: „Дрисла“ ќе биде првата депонија која ќе врши интегрирано управување со отпад на Балканот, каде што сите сегменти ќе бидат на едно место, ќе заштедува ресурси, време и средства. Останатите депонии ќе ги реализираме со концесионирање и со ИПА средства.
Се прават плановите за североисточниот и источниот регион и таму дефинитивно ќе се знае која депонија ќе почне да се гради со средства од ЕУ.
Градоначалникот на Град Скопје Коце Трајановски, објасни дека градо ќе добие 20% од профитот во претпријатието „Дрисла“, како и дека отпадот во процесот на собирање и депонирање ќе биде третиран по европски стандарди.
Според Доменико Ферацоли, претседател на италијанската ФЦЛ Амбиенте, „Дрисла“ ќе биде претворена во еколошки парк.
„Скоро една третина од отпадот во Скопје ќе биде трансформиран во енергија што е доволно за да се употреби за работа на една цела фабрика“, рече Ферацоли.
Вкупната инвестиција за трансформирање на ЈП „Дрисла“ ќе изнесува околу 80 милиони евра, а вложувањето на средствата е планирано да се изврши во период од три до четири години.
Петар Клинчарски