Старт на Копа Америка со 100-та победа на Бразил

Со стота победа на Бразил во Копа Америка, што домаќините ја постигнаа на синоќешниот натпревар против Боливија со резултат 3-0, стартуваше годинешното фудбалско првенство на американскиот континент.

Бразил иако доминираше во текот на целиот натпревар, сепак поради големиот отпор на Боливија, првиот гол успеа да го постигне дури во 50. минута, и тоа преку пенал кој го реализираше играчот на Барселона Филипе Кутињо.

Истиот играч, само три минути подоцна беше автор на вториот гол за домаќините, но овој не од белата точка, туку со удар со глава по прецизно изведен центаршут од десната страна на играчот на Ливерпул Роберто Фирмин.

Третиот гол за Бразил за конечен резултат на натпреварот од 3:0, го постигна резервистот Евертон Соареш, кој мрежата на Боливија ја затресе по само една минута игра.

Инаку, Бразил ја предводи групата „А“, во која освен Боливија, се наоѓаат и репрезентациите на Перу и Венецуела, кои вечерва во 21 часот ќе ги одмерат силите на вториот натпревар од оваа група.

Би можело да ве интересира

Гувернерот на Рио: Наркодилерите се терористи, убивајте ги со снајпери

Ана Ололовска

Бразил: Откриена фабрика за лажни „ферари“ и „ламборџини“

Ана Ололовска

Бразилскиот претседател го номинира својот син за амбасадор во САД

Ана Ололовска

Бразил ја освои Копа Америка

Ана Ололовска

КОНМЕБОЛ со одговор до Меси

Аргентина трета на Копа Америка, Меси одби да го земе медалот

Татјана Ташкова