Моисиу со совет до Мета: Реши ја кризата како јас во 2007

Поранешниот албански претседател, Алфред Моисиу на индиректен начин го посоветува актуелниот шеф на државата Илир Мета да свика лидерска средба за решавање на политичката криза во земјата.

На прашање на тиранската телевизија Ора њуз, како би делувал доколку тој во овој момент би бил шеф на државата, Моисиу изјави дека одговор дал со решавањето на кризата во 2007 година, кога во претседателската резиденција ги повика на разговори поранешниот премиер Сали Бериша и лидерот на тогаш опозициската Социјалистичка партија, Фатос Нано.

– Одговорот како треба да делува шефот на државата во вакви случаи, јас го дадов во 2007 година. Се сретнавме и заедно со сите парламентарни политички сили од тоа време изнајдовме решение за проблемот, рече Моисиу.