Теохаропулос: Во регионот „буре барут во Европа” потребни се политики далеку од национализмот

Претседателот на грчката партија Демократска левица во интервју за грчката новинска агенција АНА-МПА вели дека за да има мир, просперитет и развој во регионот потребни се политики далеку од национализмот и изолацијата. Танасис Теохаропулос, кој минатата седмица во Скопје се сретна со премиерот на Северна Македонија, Зоран Заев коментира дека средбата била особено конструктивна, јави дописничката на МИА од Атина.

-Господинот Заев е прогресивен социјалдемократски политичар, јасно решен радикално да ги промени работите во неговата земја, далеку од национализми и изолации и овие политики ни се потребни овде во „буре барутот во Европа” за да имаме иднина на мир, просперитет и развој. Затоа, по средбата, јасно сум голем оптимист, вели Теохаропулос.

Лидерот на Демократска левица вели дека на средбата со Заев разговарале за низа теми и бил известен за имплементацијата на ерга омнес во нашата земја и за промената на имињата на институциите, но и за работата на комисиите за ревизија на учебниците и онаа што ќе се формира за трговските ознаки.

-Со господинот Заев разговаравме, не само за прашањата што се поврзани со спроведувањето на Договорот од Преспа, но дополнително доставивме и конкретни предлози за развој на економската соработка и зајакнување на бизнис активностите меѓу нашите земји. Истакнавме дека од сега па натаму клучно е да има верно и успешна имплементација на договорот, на сите нивоа, без враќања назад, вели Теохаропулос за АНА-МПА.

Во однос на шпекулациите што се појавија во Грција за размена на споменици меѓу двете земји, Теохаропулос коментира дека постоеше демант како од министерката за култура на Грција, така и од Владата на Северна Македонија.

-Ако постојат такви прашања се разгледуваат и се решаваат во рамките на комисиите што ги предвидува договорот или од други ад хок комисии, додава претседателот на Демократска левица и коментира дека е потребна поголема сериозност и одговорност од сите, за да не се појавуваат од никаде такви прашања, истакнува Теохаропулос за АНА-МПА, пренесе МИА.

Би можело да ве интересира

Поплави во Грција, евакуација на населението во западниот дел на земјата

Земјотрес во Грција, почувствуван и во земјава

Павлопулос не ги потпиша декретите за избор на претседател и обвинител на Врховниот суд

Теохарис: Грчкиот туризам издржа, Халкидики e подготвен да пречека нови туристи

СИРИЗА реагира на одлуката на Владата за признавање на Гуаидо за привремен претседател на Венецуела

За осум години грчко државјанство добиле 200.000 албански граѓани

Ана Ололовска