Ердоган го обвини Израел дека е окупаторска држава, откако синоќа повторно ја критикуваше одлуката на Доналд Трамп да го признае Ерусалим за главен град на Израел.
Турскиот претседател смета дека Израел предизвикува терор со својата полиција и војници и додаде дека одлуката на Трамп не е во согласност со законите или правдата.
– Израел продолжува да се шири и да ги потиснува Палестинците. Израел е држава на окупација. Тие напаѓаат цивили, вклучително и деца во Газа и на Западниот брег, спроведувајќи терор со својата полиција и војници, вели Ердоган.
Тој кажа дека во изминатите денови разговарал со светски лидери, како и со Папата Франциско и дополни дека тоа е проблем и за христијаните и за евреите, не само за муслиманите.
– Лидерите треба да тежнеат кон мир, а не да предизвикуваат немири. Одлуката на Трамп не е во согласност со правото. Одлуката зададе тежок удар на Советот за безбедност на ОН. Она што денес го доживуваме е само резултат, а проблемот е во системот, истакна Ердоган.