Бунтовничката коалиција Сириски демократски сили денеска започна офанзива за разбивање на последните преостанати припадници на џихадистичката група Исламската држава (ИД) од градот Рака.
– Борбите ќе проодлжат се додека градот не биде целосно исчистен од терористите, вклучително и странските борци, се наведува во соопштението на Сириските демократски сили, коалиција на неколку арапски и курдски бунтовнички групи, кои имаат поддршка од САД.
Претходно денеска, портпаролот на Сириските демократски сили, Мустафа Бали соопшти дека група борци на ИД минатата ноќ се повлекле од Рака, користејќи цивили како жив штит.
Тој нагласи дека припадници на Сириските демократски сили денеска продолжуваат со борбите против преостанатите борци на ИД во Рака.
– Операцијата заврши, но борбите продолжуваат. Последните борци (на ИД), кои се согласија да го напуштат градот, се повлекоа, изјави Бали, додавајќи дека сепак дел од џихадистите, меѓу нив и странски борци, на се повлекле од Рака како што беше договрено.
Од друга страна, Сирискиот центар за мониторинг на човековите права, соопшти дека сите борци на ИД ја напуштиле Рака, која беше главно упориште на џихадистите на сириска територија и важеше за престолнина на т.н. Исламски Калифат, што групата го прогласи на териториите под нејзина контрола во Сирија и Ирак.
Во соопштението на Центарот, чие седиште е во Лондон, се вели дека Рака ја напуштиле сите борци на ИД заедно со нивните семејстав и дека се упатиле на непозната локација.
Портапролот на меѓународната антиџихадистичка коалиција, предводена од САД, Рајан Дилон, пак, информира дека во последниве 24 часа се предале околу 100 борци на ИД, кои се „отстранети од градот“.
Претставникот на Цивилниот совет на Рака, Омар Алуш, вчера соопшти дека претставници на Сириските демократски сили и на ИД се договориле да им биде овозможено безбедно повлекување од градот на сириските и на странските борци од редовите на џихадистичката група.
Претходно, меѓународната антиџихадистичка коалиција соопшти дека на странците во редовите на ИД нема да им биде дозволено да се повлечат од Рака, туку тоа ќе им биде овозможено само на Сиријците.
Сепак, Алуш подоцна соопшти дека бил постигнат договор дека доброволната евакуација важи за сите борци на ИД.