Двесетина планинари од планинарското спортско друштво „Голак“ од Делчево и планинари од Софија соседна Бугарија по прв пат организирано го искачија врвот на Малешевските Планини, Илов врв, познат како Џама Тепе висок 1803 метри.
Како што истакна на денешната прес-конференција Љупчо Чучуковски, претседател од ПСД „Голак“ од Делчево, планинарската маршрута била организирана по повод Денот на независноста – 8 Септември и Денот на ослободувањето на Делчево, 7 Септември.
– Традиционално, ние на планинарскиот марш по повод Денот на независноста на Македонија го искачувавме највисокиот врв во Македонија, Кораб, но оваа година одлучивме нашата цел да биде Илов врв, бидејќи сакаме да ги промовираме Малешевските Планини како одлична дестинација за планинарење, малку позната меѓу планинарите од земјава. Планината, која меѓу луѓето е позната и како мала Швајцарија, е идеална за овој спорт и заслужува да биде цел на сите планинари, истакна Чучуковски.
Тој додаде дека планинарите поминале 16 километри во двата правца, од почетната точка, туристичката населба Равна Река на 1.100 метри надморска височина, па сѐ до крајната цел Илов Врв за 6 часа.