Британската министерка за внатрешни работи Амбер Рад изјави денеска дека по излегувањето од ЕУ, Велика Британија сака и натаму да има длабоки и специјални врски со Унијата.
– Откако ќе почнат преговорите за Брегзит, ние ќе настојуваме да ја убедиме Германија и сите другите во ЕУ дека сакаме да бидеме силен партнер во одбраната и безбедноста, а се надевам и во трговијата, рече во интервју за радио Би-Би-Си министерката Рад.
Нејзината реакција доаѓа по излагањето на германската канцеларка Ангела Меркел на еден собир во Минхен дека „ЕУ сега мора да се избори за својата сопствена судбина“ и дека по изборот на Доналд Трамп за американски претседател и одлуката на Британиците да ја напуштат Унијата, повеќе не ќе може да се потпира врз САД и Велика Британија.
Рад во интервјуто вели дека тоа не е точно и се обидува да ја увери Меркел дека Лондон сака да ја продолжи блиската соработка со Унијата.
Изјавата на Меркел во Минхен доаѓа по Самитот на Г-7 и разочарувањето на официјален Берлин од одбивањето на Трамп да потврди дека САД остануваат на договорот за климатските промени.
– Мој впечаток е дека истекува времето кога ЕУ, Германија и другите во ЕУ зависеа од другите од надвор, изјави Меркел на собирот во баварскиот главен град, дофавајќи дека приоритетот сега ќе се насочи на силните и блиски односи со Франција и претседателот Емануел Макрон.