Српската министерка за евроинтеграции Јадранка Јоксимовиќ и директорот на Канцеларијата на Владата на Србија за Косово и Метохија, Марко Ѓуриќ денеска на амбасадорите на земјите членки на ЕУ во Белград им предадоа „нон пејпер“ документ во кој се бара од меѓународната заедница да ја „осуди агресивната реторика која без сомнеж го втурнува регионот на Западен Балкан во нови судири и поделби“.
Во документот „со загриженост се предупредува дека јавниот дискурс кој повикува на насилство во услови на отсуство на суштински дијалог меѓу Белград и Приштина и нестабилност во Македонија, претставува сериозна и отворена закана за мирот во Југоисточна Европа“.
Српската Влада во документот повикува на „неодложно продолжување на дијалогот меѓу Белград и Приштина за нормализација на односите под покровителство на ЕУ“.
– Србија инсистира на изнаоѓање избалансирано и мирно решение за кризата во Македонија, како и на безусловно почитување на меѓународните норми во однос на почитувањето на територијалниот интегритет и суверенитет на меѓународно признатите држави и на отфрлање на насилството како средство за оставрување на политичките цели, се посочува во документот.
Во „нон пејперот“ се наведува дека и покрај воздржаните реакции на српската Влада, албанските лидери во Албанија, Косово и југот на Србија „на координиран начин и со несмален интензитет продолжуваат со неодговорните и провокативни изјави и агресивната реторика, со цел постепено легитимирање на идејата за промена на меѓународно признатите граници на Балканот и промоција на воспоставувањето на т.н. Голема Албанија“.