Палестинскиот претседател Махмуд Абас инсистира на запирање на ширењето на израелската доселеничка активност на окупираните територии и изјави дека е посветен на решението со две држави, откако американскиот претседател Доналд Трамп спомена дека може да прифати алтернативни начини на уредување на израелско-палестинскиот конфликт, пренесоа британските медиуми.
„Палестинското раководство ја подвлекува својата посветеност на решението со две држави и на меѓународното право и меѓународната легитимност на начин што ќе обезбеди запирање на израелската окупација и создавање на палестинска држава со главен град Источен Ерусалим“, соопшти канцеларијата на Абас.
Палестинскиот претседател изјави дека се согласува со повикот на Трамп кон Израел за воздржување од доселеничка активност на окупираниот Западен брег и во Источен Ерусалим.
„Претседателството сака (Израел) да се согласи (со повикот на Трамп) и тој на меѓународната заедница за запирање на сите доселенички активности, вклучувајќи го окупираниот Источен Ерусалим“, соопшти канцеларијата на Абас.
Во соопштението се посочува дека Палестинците ја потврдуваат својата „подготвеност да работат со Владата на Трамп за постигнување на мирот “.