На поетот Ристо Лазаров денеска ќе му биде врачена наградата „Дијалог“ за 2012 година за неговата стихозбирка „Ситночекорка“.
Наградата ќе му ја врачи уредникот на здружението за уметност и култура на живеење „Дијалог“, Веле Смилевски, а за творештвото на Лазаров ќе говори академик Георги Старделов. Стихови од наградената книга ќе чита актерот Сенко Велинов.
Наградената стихозбирка е 20-тата поетска книга на Лазаров. Со нејзиното објавување се одбележуваат 40 години од појавата на првата стихозбирка „Ноќна птица во паркот“ на Лазаров.
Ристо Лазаров е добитник на највисоките литературни признанија како што се наградите „Ацо Шопов“ на Друштвото на писателите на Македонија и „Браќа Миладиновци“ на Струшките вечери на поезијата. Неговите песни се застапени во сите антологии на новата македонска поезија презентирани во светот, а посебни книги од неговото творештво се објавени во Русија, Австралија, Албанија, Србија, Англија, Словенија и Чешка.