Македонскиот претставник во Лигата на шампионите Металург в сабота ќе го игра вториот натпревар од Д групата. Во Скопје ќе гостува швајцарскиот шампион Кадетен Шафхаузен.
Тренерот Лино Червар на денешната прес конференција истакна дека очекува тежок дуел.
– Кадетен загуби дома во првото коло, а тоа значи дека нас ќе ни биде потешко, бидејќи тие ќе сакаат да ги надоместат изгубените бодови. Меѓутоа и ние сакаме прв триумф оваа сезона во Лигата на шампионите. Имаме млада екипа и сакаме да покажеме дека сме на добар пат. Имаме голем притисок дека играме дома, но тоа од друга страна може да има и позитивен ефект, изјави хрватскиот стратег.
Капитенот на „металурзите“ Жарко Пешевски очекува запишување на првите бодови во ЛШ.
-Атмосферата во тимот е добра. Мотивирани сме и очекуваме поддршка од навивачите. Се подготвуваме да постигнеме добар резултат и да се радуваме, рече Пешевски.
Натпреварот Металург – Кадетен Шафхаузен се игра во сабота од 17:30 часот во СЦ „Борис Трајковски“ во Скопје.