Австралиската Влада го зајакна притисокот врз родителите кои се противат на вакцинирањето на нивните деца, при што се закани дека ќе го стопира исплаќањето социјална помош за семејствата, кои не ги вакцинираат своите деца.
Од 1 јанаури 2016 година семејствата ќе можат да загубат годишно 15 илјади австралиски долари (11.400 американски долари) од дете од даночни олеснувања и помош, бидејќи во формуларите за социјална помош се укинува категоријата „се противат поради лично убедување“. Оваа категорија им овозможува на родителите да ги користат сите социјални бенефиции, без да ги имунизираат своите деца.
Околу 97 отсто од Австралијците се имунизирани. Бројот на деца под седумгодишна возраст, кои не се вакцинирани, бидејќи нивните родители се против вакцинирањето, се зголеми за 24 илјади изминатата деценија. Вкупно 39 илјади деца во земјата не се вакцинирани.