Масовните миграции на Албанците од Косово во државите на ЕУ, во последните шест месеци се организирани и разработени во детали, со цел косовските власти да избегнат социјални немири, пренесуваат приштинските медиуми, повикувајќи се на наводи на српските институции, но и на самите Албанци од Косово. Станува збор за 60.000 или 100.000 лица кои бараат азил во државите членки на Европската унија.
-На Косово животниот стандард е значително понизок во однос на Србија. Европа од властите се повеќе бара и нема да биде можно да купуваат мир така што не плаќаат струја, се занимаваат со шверц, пренесува српски Блиц.
Миграциите ги прифати средниот слој од населението, кој се повеќе е револтиран поради економската состојба. Некаде на есен на социјалните мрежи како вирус започнаа да се шират информации за можност за преселби во ЕУ-вели извор од српските служби. На интернет е презентирана информација дека Германија, Швајцарија и Франција ги отвориле своите врати за мигранти од Косово, а потоа започнаа да кружат приказни на Албанците кои веќе ги напуштиле своите огништа и дека во државите на ЕУ обезбедиле подобра иднина за своите деца.
И директорот на српската полиција Милорад Вељовиќ изјави дека се сомнева дека миграцијата е организирана, бидејќи кај бегалците е забележан ист износ на пари, а станува збор за лица со среден имотен статус. Како што пренесе српски „Блиц“, овие информации ги потврдиле и самите Албанци од Приштина.
-Неколку мои познаници го напуштија Косово иако не живееа на работ на сиромаштијата, туку едноставно сакаа подобар живот за себе. Доста им е од изолираноста, а доколку имаат работа и за неа беа слабо платени. Затоа ја користат можноста да заминат бидејќи не е комплицирано да се помине границата -вели Уран Хаха, од Косово, чии што браќа заминале од своите домови.
Тој додава дека доколку луѓето не си заминат, ќе започнат големи немири поради незадоволство.
-Не е лесно да се остави се и да се замине, да се испишат децата од училиште. Ја прашувам власта како да го оставам детето овде ако знам, дека нема да има работа и иднина. Имам работа овде, но немам плата од која можам да живеам. Ние ги немаме елементарните услови за живот и во тоа е поентата на приказната – вели Хаха, за „Блиц“.
Инаку како што се наведува во Приштина дури 18 проценти од населението живее во екстремна сиромаштија, а невработеноста е над 60 проценти.
Е. Г.