Европската унија го успорува преговарачкиот процес на Турција, изјави денеска турскиот министер за ЕУ, Волкан Бозкар на 75-та седница на парламентарната Комисија Турција-ЕУ во Брисел.
Тој истакна дека Унијата е одговорна за успореното темпо на преговарачкиот процес на Анкара и оти Брисел треба да се придржува кон обврските кон Турција и да не создава „политички бариери“.
Бозкар наведе дека од почетокот на преговорите со ЕУ, од 30 октомври 2005 година, отворени се само 14 од вкупно 35 поглавија, а само едно е затворено.
– За жал преговарачкиот процес не тече како што треба. Процесот се соочува со отпор од одредени земји-членки. Седумнаесет поглавија се уште се блокирани од политички причини, посочи Бозкар.
Тој истакна дека ЕУ со другите земји-кандидати прво ги разгледувала прашањата за човековите права, за судскиот систем, за независноста и безбедноста, а со Турција тие поглавија не се отворени.
Турција ги почна преговорите за членство во ЕУ во 2005 година, но поради кипарското прашање, но и противењето од Германија и од Франција голем дел од процесот е блокиран.