Селекторот на чилеанската фудбалска репрезентација Хорхе Сампаоли потврди дека останува на функцијата до 2018 година.
– Донесов одлука да го предводам Чиле на натпреварите од Купот на Америка и во квалификациите за Светското првенство 2018 година и секако на шампионатот ако се пласираме, изјави аргентинскиот стручњак.
Под водство на Сампаоли, Чиле на неодамна завршениот Мундијал во Бразил прикажа одлични партии. Ја помина групата во конкуренција на Шпанија, Холандија и Австралија, а во осминафиналето го намачи домаќинот Бразил кој беше поуспешен дури по изведувањето пенали.
Токму добрите игри на шампионатот беа препорака Чилеанскиот фудбалски сојуз подолго да го задржи 54-годишниот Сампаоли на кого идната година му истекуваше договорот.