Возачите кои сакаат возбудливи автомобили, но од друга страна имаат и семејство кое мора да биде безбедно и да му се обезбеди комфор при патувањето, се принудени на многу компромиси при изборот на своите возила.
Се чини дека во таквите нивни желби им помогна компанијата „Опел“ кога го понуди моделот „Инсигнија“ со дволитарски дизел мотор со речиси 200 коњски сили, што на возачите им ја нуди потребната моќност и задоволување на нивната страст, а од друга страна ја дава неопходната безбедност при патувањето.
Првиот модел на Инсигнија се појави во 2008 година, иако концептот на вакво возило беше промовирано на саемот за автомобили во Франкфурт уште во 2003 година. До 2008 година моделот „Опел Вектра“ и неговата хечбек варијанта „Сингнум“, според многумина, беа конзервативно дизајнирани, па појавата на „Инсигнија“ со нејзините возбудливи линии беше дочекана со воодушевување од страна на купувачите.
Во текот на минатата година се појави најновиот модел на „Инсигнија“ – 2.0 ЦДТи Битурбо 195 КС Козмо, која претставува рестилизирана верзија на првите типови на „Инсигнија“ од чија платформа изминатите години се развија и Сааб 9-5 и Шевролет Малибу.