Турски јавни обвинители почнаа кривична истрага против исламискиот проповедник Фетула Ѓулен, кој живее во прогонство во САД, врз основа на тврдења дека се обидел да ја урне Владата, јави телевизијата Си-Ен-Ен Турк.
Турскиот премиер Реџеп Тајип Ердоган вчера изјави дека ќе побара од САД да го екстрадираат неговиот поранешен сојузник Ѓулен, кого тој го обвинува за заговор за соборување на Владата и за дестаблизирање на Турција преку фабрикувани корупциски обвиненија и снимки на телефонски разговори.
Евентуалната екстрадиција на Ѓулен, за кого се смета дека има милиони поддржувачи, би била можна само ако Турција издаде налог за негово апсење и доколку достави докази за криминал, сметаат правни експерти.
Ердоган, чија владејачка Партија на правдата и развојот (АКП) влече корени од политичкиот ислам, го обвинува Ѓулен за изградба на „паралелна држава“ од негови следбеници во институциите, пред се, полицијата и судскиот систем, преку кои се обидувал да ги преземе лостовите на државната власт.
Министерот за култура Oмер Челик за телевизијата Ен-Ти-Ви изјави дека има истрага против Ѓулен, што се темели на „сериозни обвинувања“, вклучувајќи и „шпионски активности“.
Ен-Ти-Ви, без да ги наведува изворите, исто така, информира дека истрагата преземена од државните обвинители од Анкара, се темелела на обвиненија против Ѓулен за „организирање и раководење со банда“.